Быйыл 10 төгүлүн ыытыллар өрөспүүбүлүкэтээҕи "Сахалыы дьыктаан" аахсыйаҕа Өлтөх нэһилиэгэ көхтөөхтүк кытынна.

Олунньу 13 күнэ Саха сирин үрдүнэн төрөөбүт тыл уонна сурук-бичик күнэ. Бу күн 1996 сыл Саха Өрөспүүбүлүкэтин бастакы бэрисидьиэнэ Михаил Ефимович Николаев ыйааҕынан саха норуотун улуу сырдатааччыта, талааннаах лингвист Семен Андреевич Новгородов төрөөбүт күнэ «Төрөөбүт тыл, сурук-бичик күнүнэн» биллэриллибитэ.

2014 сылтан үгэскэ кубулуйбут Өрөспүүбүлүкэ үрдүнэн Хотугулуу-Илиҥҥи бэдэрээлинэй үнүбүрсүтүөт уонна Саха Өрөспүүбүлүкэтин Национальнай бибилэтиэкэтэ тэрийэн ыытар сахалыы дьыктааны суруйуу аахсыйа Бэйдиҥэ  бибилэтиэкэтигэр буолан ааста.

Дьыктаан ыытыллар сыала-соруга: Саха тыла киэҥ эйгэҕэ-билимҥэ, култуураҕа, үөрэхтээһиҥҥэ, дьыала-куолу тылыгар, үлэ араас салаааларыгар, тэрилтэлэргэ туттуллар, сайдыбыт истииллэрдээх, олоҕурбут нуормалаах судаарыстыба тыла буолар. Таба суруйуу литэрэтиирэ, сурук-бичик тылын нуорматын биир суолталаах салаата. Бу тэрээһин оскуола оҕотуттан саҕалаан улахан дьоҥҥо тиийэ табатык суруйууну уонна төрөөбүт төрүт тыл кыһалҕаларыгар уопсастыба араас араҥатын болҕомтотун тардар сыаллаах ыытыллар.

Олунньу 12 күнүгэр Бэйдиҥэ орто оскуолатыгар  дьыктааны саха тылын уонна литератуура учууталлара А.Б.Колосова, А.Н.Захарова 8-11 кылаас үөрэнээччилэригэр ыыттылар. Манна барыта 28 үөрэнээччи кыттыыны ыллылар.

Олунньу 15 күнүгэр олохтоох библиотекаҕа дьыктаан поэт, прозаик Реас Алексеевич Кулаковскай төрөөбүтэ 110 сылыгар анаан “Биир ууга үс хонук” кэпсээниттэн быһа тардан  суруйуу буолла.

Түмүккэ, “Үчүгэй суруксут” – Бережнева Туяра Иннокентьевна, “Бастыҥ суруксут”– Аржакова Майя Иннокентьевна, “Бастыҥтан бастыҥ суруксут” – Лугинова Оксана Афанасьевна  диэн анал ааттар үөрүүлээх быһыыга-майгыга туттарыллыннылар.

Бүгүҥҥү күҥҥэ көхтөөхтүк кэлэн кыттыбыт дьоммутугар, учууталларбытыгар, үөрэнээччилэрбитигэр махталбытын биллэрэбит, өрүүтүн даҕаны саха тылын үрдүктүк тутан, дойдубут туһугар кэскиллээҕи айа-тута сылдьыаҕын!