Олунньу 28 күнүгэр Өлтөх нэһилиэгэр А.Н.Жирков аатынан Бэйдиҥэ орто оскуолабытыгар 2 сылга биирдэ ыытыллар, Бэһис “Винокуровскай ааҕыылар” региональнай научнай-практическай конференция үрдүк таһымнаахтык ыытылынна. Бу ааҕыылар нэһилиэкпит биир ытыктанар, киэн туттар, Бэйдиҥэҕэ орто оскуоланы туттарарга туруулаһан туттарбыт, Саха АССР үтүөлээх учуутала Винокуровтар учуутал династияларын олохтообут,40 сыл устата нэһилиэкпитигэр учууталынан,директорынан иитээччинэн үлэлээбит Федот Егорович Винокуровка уонна “Учуутал уонна наставник” сылынан ананан ыытылынна.

         Барыта 63 оҕо Уус Алдантан, Чурапчы уонна Амма улуустарыттан кыттан үрдүк таһымнаах конференция буолан ааста. «Учууталбыт үтүөтэ умнуллубат, кэрэтэ кэхтибэт» баай ис хоһоонноох кинигэ быыстапката уонна Винокуровтар учууталлар династияларын туһунан альбом, Федот Егорович туһунан кинигэлэр, хаһыаттан ыстатыйалар турдулар. Бу быыстапканы көрөн оҕолор, ыалдьыттар бу күн кимиэхэ ананан ыытыллыахтааҕын көрөн-истэн билэн бардылар.

         Россия уонна Саха сирин гимнэринэн торжественнай чааһа аһылынна. Эҕэрдэ тыллары оскуола директора Дансарунова Е.А., Винокуровтар учуутал династияларын салайааччыта, физико- математическай наука доктора, Саха Республикатын Академига Егоров Иван Егорович оҕолорго туһаайан бу конференция тоҕо ыытылларын, династия туһунан эппитин оҕолор чуумпуран иһиттилэр. Нэһилиэк баһылыга Алексеев К.А. Федот Егорович Винокуров – нэһилиэкпит биир ытыктанар учууталын аатынан конференция ыытылларын махтанан туран эттэ, үтүө киһи аата үйэлэргэ умнуллубатын, Өлтөх нэһилиэгин бастакы комсомолецтарыттан,учууталларыттан биирдэстэрэ буоларын аҕынна. Педдинастия чилиэттэрин “Педагог уонна наставник” сылынан эҕэрдэлээтэ. Автодорожнай факультет научнай үлэҕэ солбуйаччыта, техническай наука декана Спиридонова А.В. эҕэрдэ тыл эттэ. Тэрээһин аһыллыытын 3 кылаас уолаттара(сал Алексеева И.Г.) ырыанан эҕэрдэлээн сэргэхситтилэр.