Арассыыйаҕа Педагог уонна уһуйааччы сылын чэрчитинэн олунньу ый​ 17 күнүгэр А.Н.Жирков аатынан Бэйдиҥэ орто оскуолатын физика кэбиниэтигэр​ П.С. Охлопков аата үөрүүлээх быһыыга-майгыга иҥэрилиннэ. Бу дьоро күҥҥэ Кэбээйи улууһуттан Ситтэ нэһилиэгин баһылыга Тимофеев Семен Тимофеевич салайааччылаах​ делегация кэлэн чиэстээн, бочуоттаан дьоһун-мааны ​ күҥҥэ кыттыста. Делегацияҕа учууталларын аатын күндүтүк санаан үөрэппит оҕолоро Ил Түмэн сис кэмитиэтин бэрэссэдээтэлинэн үлэлээбит А.А.Софронеев, СӨ бэчээтин туйгуна И.И.Иванов, учуутал идэлээхтэр О.Д.Левина, А.Л.Сивцева ​ уонна Ситтэ нэһилиэгин баһылыга С.Т.Тимофеев, ​ В.Е.Колмогоров аатынан Ситтэ орто оскуолатын дириэктэрэ А.В.Новгородов кыттыыны ыллылар.

​ ​ ​ ​ ​ Петр Степанович​ 1963 сыллаахтан Кэбээйи улууһугар математика,физика учууталынан, сэбиэт бэрэссэдээтэлинэн үлэлээбитэ.Ситтэ нэһилиэгин дьоно-сэргэтэ ​ Петр Степанович туһунан​ олус истиҥник саныылларын,ахталларын ​ эттилэр. Кэбээйи элбэх ыччатын сырдыкка-кэрэҕэ​ угуйбутун, үөрэппит оҕолоро үксүлэрэ үрдүк үөрэхтээх, туруу үлэһит дьон буолан тахсыбыттарын кэпсээтилэр. Үөрэппит оҕолорун аатыттан Иванов Иннокентий Иннокентьевич: “Петр Степанович улуу педагогтартан биирдэстэрэ диэн, биһиги үөрэппит оҕолоро​ сыаналыыбыт”- диэн эттэ. Үөрэппит оҕолоро уонна Ситтэ ​ нэһилиэгин дьаһалтата өйөөн 2022 сыл​ ахсынньы​ 23 күнүгэр, №5 улуус депутаттарын быһаарыытыгар олоҕуран П.С.Охлопковка Кэбээйи улууһун бочуоттаах олохтооҕун аатын анаатылар. Бу бэлиэни үөрүүлээх линейкаҕа Ситтэ нэһилиэгин баһылыга С.Т.Тимофеев Петр Степанович кэргэнигэр Ольга Афанасьевнаҕа туттарда. Ону таһынан кэнэҕэскитин Ситтэ нэһилиэгэ уонна Өлтөх нэһилиэгэ бииргэ үлэлэһэ туруохпут диэн сөбүлэҥ түһэрсибиттэрин, ытыс дохсун тыаһынан иһитиннэрдэ.Кэлбит ыалдьыттар Өлтөх нэһилиэгин кэнчээри ыччата кини туйаҕын хатарар, аатын ааттата үүнэн-сайдан тахсыахтарын, кини курдук киэҥ көҕүстээх,киэҥ билиилээх дьон буоллуннар диэн баҕа санааларын тиэртилэр.

​ ​ ​ ​ Петр Степанович ​ олоҕун аргыһа Ольга Афанасьевна ыраахтан кэлбит ыалдьыттарга махтал тылын эттэ. «Үтүө аата умнуллубат» быыстапка туруорулунна. Оҕолор, ыалдьыттар олус интэриэһиргээн көрдүлэр.

  Өлтөх нэһилиэгин ыччата үөрэхтээх, киэҥ билиилээх буоларын туһугар тугунан да кэмнэммэт, сыаналаах кылааты киллэрбит, биир үтүөкэн учууталбыт Петр Степанович    баарын курдук, физика биридимиэтэ үрдүктүк тутуллан, элбэх оҕо үөрэммит оскуолатын ааттата сылдьыа диэн эрэнэбит.