Уус Алдаҥҥа Мэҥэ Хаҥалас хайысхатыттан киирии өйдөбүнньүк Мэҥэ бэлиэ Аан аартыга бэс ыйын 27 күнүгэр үөрүүлээх аһыллыыта буолан ааста.

Бу бэлиэ түгэҥҥэ Уус Алдан улууһун аҕа баһылыктара ыалдьыттаатылар. Аан тылы улууспут баһылыга Алексей Васильевич арыйда, салгыы Өлтөх нэһилиэгин аҕа баһылыга Константин Анатольевич бу өйдөбүнньүк бэлиэ аан аартыкпыт былыргы историятыттан сырдатан кэпсээтэ.

Бу күн айаммыт аан аартыга арыллыбыт бэлиэ түгэнин мүччү туппакка, өр кэмнэргэ күүппүт-кэтэспит Саха сирин норуоттарын 8 спортивнай оонньууларын уота Амма улууһуттан Уус Алдан улууһун сиригэр-уотугар кылам уота саҕылынна. Спортивнай оонньуу уотун Горохов Дмитрий Николаевич салайааччылаах Бэйдиҥэ бөһүөлэгин устун Өлтөх нэһилиэгиттэн үүнэн-сайдан тахсыбыт, спортка бэйэлэрин сүдү кылааттарын киллэрсибит спортменнарбыт устун илииттэн илиигэ айаннаата. Ол кэннэ А.Н.Жирков аатынан Бэйдиҥэ оскуолатын оҕо спортивнай площадкатыгар кэлэн, олохтоох нэһилиэнньэни кытта көрүстэ, оонньууларга көхтөөх кыттыыны, ситиһиини баҕардылар, Бэйдиҥэ төрүт олохтооҕо биир тумус туттар спортка сүдү хардыылары оҥорбут киһибит Андросов Николай Семенович бэйэтин эҕэрдэ тылын этэн, 8 спортивнай оонньуу уотун улууспут бары нэһилиэктэрин кэриттэрэ, оонньуулар уоттарын айаннатыы анал салайааччытыгар Горохов Дмитрий Николаевичка туттарда. Спортивнай оонньуу уота салгыы Өлтөх нэһилиэгин устунан Арыылаах сиригэр-уотугар хардыылаата.